حلو الشتي.. بقلم : أميرة صليبه
#سفير_برس
شوبحب ترجع ليلنا برد وشتي
بيغيبتك صارت فكاري مشتتي
كانون ريحو عاتيه بابي انفتح
فكرت حسيت بهوايي ولهفتي
إسمع طرق عالباب ويدق القلب
تاري المطر كذاب زوّد لوعتي
بالموقدة الحطبات نارن جمّرت
تذكّر عهالموقد شو فارت قهوتي
مابتنطفي نارك لو اشتد البرد
طيفك برغم البرد روحي ودفوتي
عتم وطريق بعيد كيف بدك تصل
شوخايفه هالدرب تسرق فرحتي
إندهلك بهالليل يرتدّ الصدى
بحياة الله لابقى تقلي اسكتي
بتعرف بخاف من العتم ليش بعدت
لاعاد تتركني بخوفي و غربتي
رح أنطر الشباك مارح سكّرو
ضويلك بروحي ان دابت شمعتي
وأسمع هسيس الريح حسّ بدعستك
يلي سرقت قلبي وعيوني وغفوتي
يدندن فؤادي ماعرف طعم الفرح
بتعرف مافيني نام ساكن مقلتي
تذكرت كيف تمرجحت كيف ضحكت
وقلتلي فيي تمسّكي وتثبّتي
شو خجلت من لمسة إيديك غمرتني
من يومها صارت جميلي دنيتي
واليوم روحي بتنطرك خوف وقلق
شوبخاف ما تطوّل ياعمري ورجوتي
وطليت من هالباب طيرني الفرح
أنت جناحي ونور عمري وزهوتي
#سفير_برس _ بقلم _ أميره صليبه
